JINSI YA KUISHINDA HOFU NA NGUVU YA UCHAWI

NAANDIKA mada hii baada ya kuona na kusikia kesi nyingi juu ya watu kuishi maisha yaliyojaa hofu ya kudhurika kwa visasi na vijicho vya wabaya wao.
Hakuna ubishi katika mtazamo wa dunia kwamba kuna maisha chanya na hasi, ambayo yanamzunguka mwanadamu katika safari yake ya kuishi. Lakini ugumu anaoupata mwanadamu na pengine ndiyo ambao nataka kuuzungumzia leo ni jinsi gani anaweza kuishi ndani ya mambo mema na mabaya.
Kama kilivyo kichwa cha habari hapo juu, nimeona nijikite zaidi katika kutoa mbinu tatu anazoweza kuzitumia mtu ili kujikinga na nguvu za giza au kumshinda mtu anayetaka kumwangamiza. Labda nitaje dhana tu ambazo zinawaogopesha wengi katika maisha yao.
Kimsingi jamii inaogopa sana kurogwa, kuuawa kwa nguvu asili au kutendewa aina yoyote ya ukatili na watu wanaojiita wachawi na washirikina. Kuna kesi nyingi sana kwenye ndoa kuhusiana na kutaka kuangamizana kwa uchawi na kutoana roho kwa silaha. Hali hii iko karibu kila mahali anapoishi mwanadamu.
Katika maeneo ya kazi watu wanashindwa kutekeleza majukumu yao kwa hofu ya kutendewa mabaya na wabaya wao, lakini wapo ambao wamekufa kwa kufanyiwa hivyo na maadui zao. Inawezekana hata wewe unayesoma mada hii umeshasikia au kukumbwa na kadhia ya adui yako mchawi.
Kimsingi hii ni changamoto isiyoepukika katika maisha ya mwanadamu yeyote. Huwezi kuamua kuishi na watu wema tu na ukawakwepa wenye roho mbaya na chuki zisizokuwa na sababu. Wale unaokula nao ndiyo wabaya wako, methali ya Kiswahili inasema.
Unachotakiwa kufanya ni kujua tu nini cha kufanya ili umshinde adui yako na wewe uendelee kuishi katika ndoa, kazi, biashara na masomo yako kwa amani na usalama. Kwa maana hiyo nakushauri ufuate kanuni hizi tatu za kisaikolojia ambazo naamini zitakuwezesha kwa asilimia kubwa kumshinda adui yako aliyepanga kukudhuru kwa uchawi au kwa njia nyinginezo.

1. UPENDO
Mpendwa msomaji wangu, watu wengi wamejikuta wakiwapa nafasi adui zao kuwaaangamiza kwa sababu hawajui nguvu ya upendo.  Mara nyingi upendo hutafsiriwa kama haki. Nina maana kwamba kila apendaye anatenda haki ambayo ina nguvu ya kumkinga na mabaya yote kutoka kwa hao aliowapenda.
  Zingatia jambo moja muhimu kuwa hatua ya kwanza ya mtu kudhurika inaanzia kwenye hofu ambayo hukuzwa na mawazo yake mweyewe. Ni mawazo yanayompa mhusika shaka juu ya matendo yake binafsi ayafanyayo mbele ya wenzake. Atendaye wema anajiamini zaidi moyoni kuliko atendaye mabaya. Huu ni ukweli.
Siku zote mtu mwenye upendo hawezi kuhofu kutendewa mabaya na watu aliowatendea wema na kuwapenda. Kuwa na mawazo hayo pekee huweka kinga thabiti ya mwili kukabili nguvu asili mbaya zinazoelekezwa kwake, kwa vile moyo na fikra huwa hazihukumu kwa matendo na hivyo kuondoa hofu ya kulipwa mabaya.

JINSI YA KUISHINDA HOFU NA NGUVU YA UCHAWI-2

LAKINI jambo baya sana ambalo linawaponza watu wengi ni kwamba wanapogundua kuwa watu fulani ni maadui zao, wao nao huanza kushambulia kwa chuki.
Kufanya hivyo huzifanya nguvu asili zitafutane na kushawishi mawazo yatilie shaka kila kitu kinachojitokeza na hukihusisha na shambulio la mbaya uliyekosana naye adabu.
Hutakiwi kumchukia mtu ambaye unahisi ni adui yako. Unachotakiwa kufanya ni kumpenda na kujipendekeza kwake, ili yeye aone aibu ya kukufanyia ubaya. Usilipe ubaya kwake hata kama ushahidi unaonesha kuwa yeye ndiye aliyekuchongea kwa bosi wako ufukuzwe kazi.
Ukifanya hivi utakuwa umejiokoa na shambulio la adui yako kwa kiwango kikubwa. Nasisitiza upendo! Wanawake mlioolewa wapendeni mawifi zenu, wakwe hata kama mtahisi wana chuki nanyi. Wafanyakazi, wafanyabiashara, pendaneni mkijua kuwa UPENDO ni kinga yenu.
2. UKWELI USEMWE
Hatua inayofuata ambayo saikolojia inahesabu kuwa ni moja ya kinga kubwa zinazoweza kumfanya adui yako asikudhuru ni kumweleza ukweli kuhusiana na mipango yake ya kukuangamiza, hasa ushahidi wa wazi unapokuwepo.
Mtu mbaya anapogundua kuwa amejulikana kuwa yeye ni mbaya, moja kwa moja anakuwa amenyonywa nguvu za kutekeleza mipango yake. Zingatia kipengele cha kwanza cha upendo katika kufikisha ujumbe wako kwake.
 Kwa mfano unapofahamu kuwa wifi yako ndiye anayekuroga, kwanza mpende, kisha mwite na umwambie hivi “wifi yangu nakupenda sana natamani uwe karibu yangu unisaidie katika maisha yangu, lakini sijui kwa nini wewe hunipendi, hivi utajisikiaje kama mimi nikifa au nikiachika?” malizia halafu unyamaze.
Nakueleza ukishamwambia hivyo moja kwa moja atajua kuwa umeshafahamu mipango yake na kitakachotokea akili yake lazima itafute ubaya wako tu ikishakosa ina maana atakuwa amekosa uwezo wa kukufanyia ubaya.
Aidha, hata kama akifanya utashangaa anafanya kwa kiwango cha chini sana kutokana na hofu iliyojengwa kwake na mawazo yake ya kukuonea.
Lakini nasikitika kusema watu wengi hushindwa kunyonya nguvu za maadui zao kwa kueleza ukweli kwa sababu wanatumia jazba na matusi, mfano “wewe kafiri kweli, mema yote haya nakufanyia huoni tu mpaka unataka kuniroga, haya niue na wewe utakufa.” Ukisema hivyo unachochea nguvu zake za kukudhuru.
3. IMANI
Ukitaka kuitafsiri imani kwa maneno mepesi, unaweza kusema ni kukubali na kuyakataa mambo unayoyaona na kuyasikia.  Katika tafsiri hii ichukue akili kama kiini cha maamuzi ya kile unachokiamini.
Siku zote unapotazama kitu epuka sana kufanya kionekane kuwa kinashinda maamuzi na ubinadamu wako.  Kwa mfano umeona damu kwenye mlango wa nyumba yako, kwa nini uwaze kuwa ni uchawi na kwa nini isiwe ni damu ya mijusi iliyomwagika wakati wanagombana? Jiamini wewe na nguvu zako, usiogope mazingira tu.